伙计慢打锣 时间: 2008年08月28日 来源: 南方都市报
广州掌故
□Highyun
浏览一位老广府学者嘅网站,无意中见到一篇文章以“伙计慢打锣”为标题,不由得产生好奇之心。向父亲求索该短语来源嘅过程中,更意外得到一段关于卖武佬嘅故事:
市集嘅空地上,密密围住一圈人,人群内传出阵阵招揽观众嘅锣鼓声。只听见圈内有人大叫:“伙计慢打锣!”此人应为卖武档主。助手又一阵锣鼓,见围观嘅人足够多,锣鼓骤停,两人就开始有趣嘅对话。
档主:“打得锣多锣吵耳!”
助手:“炒猪耳!”
档主:“打得更多夜又长!”
助手:“炒猪大肠!”
此时档主更加醒神,继续同助手一唱一和:“洪刘蔡李莫,系广东嘅五大名家。”“攞嚟炒明虾。”“小朋友企定唔好两头走!”“冬菇蒸鸡南乳猪手!”“一声锣鼓震四方。”“五湖四海把名扬——”
当——当——当——
锣鼓响过,两位卖武佬就开始表演功夫喇:舞刀耍棍,拳脚搏击,心口碎大石,喉顶枪头……为求博得观众掌声,十八般武艺都攞晒出嚟,呢部分亦系整场骚嘅戏肉。正当精彩处,两人忽然停低,档主向围观者拱手行礼:“今日我哋嚟呢度呢,唔系卖药。”助手:“噉系做乜嘢啊?”档主:“我哋系嚟传招牌嘅!”
“唔系卖药”当然系此地无银三百两,因为呢个时候,佢哋就开始推销自己嘅秘传跌打酒,亦往往系呢个时候,围观者开始陆续散水。江湖卖武佬靠卖药赚水脚费当然无可厚非,而且佢哋重娱乐咗大众。今日睇嚟,呢种本土特色嘅江湖卖武更系上一辈人嘅一种珍贵回忆,再亦冇可能睇得返……
讲返“伙计慢打锣”呢句话,其实意思就系“开场白”。皆因当时所有卖武佬都系以呢段对话作为卖武嘅开场白,所以今日,做某件事之前想招揽观众/听众,都可以“伙计慢打锣”。我所讲嘅嗰位老学者嘅文章,正好系佢网站入面嘅第一篇文章,原来佢系想告知读者:“有好嘢睇喇!” |