广州市第一中学校友会论坛

标题: 糊涂官___讲个55年前听过的古仔庆38 [打印本页]

作者: 依慈 时间: 2014-3-6 14:56 标题: 糊涂官___讲个55年前听过的古仔庆38

  从前有个土豪穷到只有钱,还生咗个蠢仔,教死先生打烂手板只学识担挑同"一"字似样.点光宗耀祖呢?土豪谂烂头壳果断採取两个措施.1立即买个官比个傻仔做,一步到位.2同佢娶个叻老婆,样样帮佢补锅,日日踎枱底用手语手势指点傻仔审案判案.
  今日一早就撞鬼啦,肥和尚和瘦道士当街过招,打到一锅粥众人扯不开劝不住.肥和尚砸实道士一啖咬甩道士个鼻哥.众人将僧道齐齐扭上公堂,将大鼓擂到轰天咁响.傻官裙拉裤甩来升堂,夫人急步踎枱底,傻官一拍惊堂木,衙差棍顿喊堂威,傻官望见一口血的肥和尚和一面血的瘦道士讲:何人捣乱所为何事?从实招来.搞咗半天才知道士是原告和尚是被告,道士又痛又无咗鼻哥,哦半日晕咗过去.傻官问和尚,和尚讲:冤枉呀大老爷,我无咬佢咖佢自己咬咋.傻官讲:鼻高口低点够高咬咖?和尚讲:佢担凳仔咬咖.傻官一谂,系啦,唔够高企凳仔就够高,于是一拍惊堂木:大胆道士诬告和尚,全部打走退堂.班衙差忍笑将和尚赶走将道士抬出公堂闩门散水.
  夫人踎到脚痺又听唔真原吿诉状三下手势退堂自己都未出手语指示,激动面红面綠,揪住傻官返后堂跟进案情.夫人问:点解咁快退堂?傻官话:道士自己咬甩个鼻哥冤枉人咋.夫人问:自己点够高咬鼻哥?"企境凳仔啰."夫人气到拧实傻官只耳,"你立即咬比我睇".于是傻官企凳仔企高凳担梯直至爬上屋顶都无法自咬鼻哥,知道判咗冤案够湿滞啦,比人笑到孙个代兼等弹劾啦,急到标s标尿标眼泪,喊:夫人救我,呀..呀...呀......"立即呌衙差追返哂人来,重新升堂,睇我手势再判."
  傻官不敢怠慢,立即叫衙差追返和尚道士及街坊地保一干人来,重新升堂.傻官一拍惊堂木:大胆禿驴耍本官,本官琴晚擒上瓦面都......这时夫人扯官袍制止傻官再讲失礼死人,并伸出5只手指,意思是,讲乜,打50版杀下威先.点知糊涂官傻气攻心,讲:来人呀,将和尚拉下打5板......夫人掹死啦,一扯官袍制止,并将手一正一反10次,意思是1五1十2五2十......点知傻气继续攻心的糊涂官又叫:慢,将和尚反转来打,夫人急伸手摇动,意思系:错啦,打50大板乜反转来打,手搖来摆去,傻官一旧云啦,更升级傻大叫,:咪住,帮和尚搓下个肚腩先.......乜说话,夫人激到咬牙"各各声"五官紧急集合咬牙切齿,傻官一睇大叫:停手咪搓,将和尚个鼻哥咬埋落来......衙差大眼瞪细眼,这个官真糸玩死人啰,咩公堂来咖?这时夫人火山爆发啦,从枱底标出来扯住官咬牙切齿准备兜巴升,傻官一边逃命一边叫:大家停手,等太太自己来咬......

作者: 如梦令 时间: 2014-3-6 16:03

个官太有十条命都唔够死

作者: 依慈 时间: 2014-3-6 19:40

如梦令发表于 2014-3-6 16:03
个官太有十条命都唔够死

如果妇女无地位无平权叻到识飞都无用,巧妇常伴拙夫,好惨咖.

作者: 如梦令 时间: 2014-3-6 21:32

依慈发表于 2014-3-6 19:40
如果妇女无地位无平权叻到识飞都无用,巧妇常伴拙夫,好惨咖.

宜家妇女能顶半边天啦，一样有机会十条命都唔够死，一句到尾——命

欢迎光临广州市第一中学校友会论坛 (http://gzyzxyh.fa.chinadds.net/)